مکمل شاعری
کچھ یادیں اور کتابیں ہوں مرا عشق ہو اور یارانے ہوں
اسی آب و ہوا میں رہنا ہو اور ساری عمر بتانی ہو
کوئی ناؤ کہیں منجدھار میں ڈوبے چاند سے الجھے اور ادھر
موجوں کی وہی حلقہ بندی دریا کی وہی طغیانی ہو
یوں خانۂ دل میں اک خوشبو آباد ہے اور لو دیتی ہے
جو باد شمال کے پہرے میں کوئی تنہا رات کی رانی ہو
کوئی یاد ہی رخت سفر ٹھہرے کوئی راہ گزر انجانی ہو
جب تک مری عمر جوان رہے اور یہ تصویر پرانی ہو
ہم کب تک اپنے ہاتھوں سے خود اپنے لیے دیوار چنیں
کبھی تجھ سے حکم عدولی ہو کبھی مجھ سے نافرمانی ہو
اسی رات اور دن کے میلے میں ترا ہاتھ چھٹے مرے ہاتھوں سے
ترے ساتھ تری تنہائی ہو مرے ساتھ مری ویرانی ہو
کیا ڈھونڈتے ہیں کیا کھو بیٹھے کس عجلت میں ہیں لوگ یہاں
سر راہ کچھ ایسے ملتے ہیں جیسے کوئی رسم نبھانی ہو
— سلیم کوثر