مکمل شاعری

چشم بے خواب ہوئی شہر کی ویرانی سے

دل اترتا ہی نہیں تخت سلیمانی سے

یوں ہی دشمن نہیں در آیا مرے آنگن میں

دھوپ کو راہ ملی پیڑ کی عریانی سے

ہم نے اک دوسرے کے عکس کو جب قتل کیا

آئینہ دیکھ رہا تھا ہمیں حیرانی سے

پہلے تو رات ہی کاٹے سے نہیں کٹتی تھی

اور اب دن بھی گزرتا نہیں آسانی سے

کوئی بھی چیز سلامت نہ رہے گھر میں سلیمؔ

فائدہ کیا ہے بھلا ایسی نگہبانی سے

آنکھ پہچانتی ہے لوٹنے والوں کو مگر

کون پوچھے گا مری بے سر و سامانی سے

اب کے ہے لب آب ہی مر جائیں گے

پیاس ایسی ہے کہ بجھتی ہی نہیں پانی سے

— سلیم کوثر