مکمل شاعری

بس اک رستہ ہے اک آواز اور ایک سایا ہے

یہ کس نے آ کے گہری نیند سے مجھ کو جگایا ہے

کہاں تک روکتے آنکھوں میں ابر و باد ہجراں کو

اب آئے ہو کہ جب یہ شہر زیر آب آیا ہے

بچھڑتی اور ملتی ساعتوں کے درمیان اک پل

یہی اک پل بچانے کے لیے سب کچھ گنوایا ہے

ہمیں اک اسم اعظم یاد ہے وہ ساتھ ہے، ہم نے

کئی بار آسماں کو ان زمینوں پر بلایا ہے

تمہیں کیسے بتائیں جھوٹ کیا ہے اور سچ کیا ہے

نہ تم نے آئنہ دیکھا نہ آئینہ دکھایا ہے

سلیمؔ اب تک کسی کو بد دعا دی تو نہیں لیکن

ہمیشہ خوش رہے جس نے ہمارا دل دکھایا ہے

ادھر یہ دل ابھی تک ہے اسیر وحشت صحرا

ادھر اس آنکھ نے چاروں طرف پہرہ بٹھایا ہے

— سلیم کوثر