مکمل شاعری

نہ اس طرح کوئی آیا ہے اور نہ آتا ہے

مگر وہ ہے کہ مسلسل دیئے جلاتا ہے

یہ لوگ عشق میں سچے نہیں ہیں ورنہ ہجر

نہ ابتدا نہ کہیں انتہا میں آتا ہے

وہ کون تھا میں جسے راستے میں چھوڑ آیا

یہ کون ہے جو مرے ساتھ ساتھ آتا ہے

یہ کون ہے جو دکھائی نہیں دیا اب تک

اور ایک عمر سے اپنی طرف بلاتا ہے

کبھی سفر کبھی رخت سفر گنواتا ہے

پھر اس کے بعد کوئی راستہ بناتا ہے

جو آسمان سے راتیں اتارتا ہے سلیمؔ

وہی زمیں سے کبھی آفتاب اٹھاتا ہے

وہی تسلسل اوقات توڑ دے گا کہ جو

در افق پہ شب و روز کو ملاتا ہے

— سلیم کوثر