مکمل شاعری

دیوانے ہیں ہم جھوٹ بہت بولتے ہیں

ہم کو سر بازار یہ عزت دی جائے

جب میری گواہی بھی مرے حق میں نہیں

پھر شہر میں کس کس کی شہادت دی جائے

پھر گرد مہ و سال میں اٹ جائیں گے

آئینہ بنایا ہے تو صورت دی جائے

اصرار ہی کرتے ہو تو اپنا سمجھو

دینا ہی اگر ہے تو محبت دی جائے

چھڑ جائے تو طبقات کی اب جنگ سلیمؔ

کچھ بھی ہو مگر ہم کو نہ زحمت دی جائے

ہم جاگتے رہنے کے بہت عادی ہیں

ہم کو شب ہجراں کی مسافت دی جائے

اب فیصلہ کرنے کی اجازت دی جائے

یا پھر ہمیں منزل کی بشارت دی جائے

وہ جس نے مجھے قتل پہ اکسایا تھا

اس شخص سے ملنے کی بھی مہلت دی جائے

— سلیم کوثر