مکمل شاعری

کیا جانیں تری امت کس حال کو پہنچے گی

بڑھتی چلی جاتی ہے تعداد اماموں کی

وہ لوگ جنہیں کل تک دعویٰ تھا رفاقت کا

تذلیل پہ اترے ہیں اپنوں ہی کے ناموں کی

ہر گوشۂ مغرب میں ہر خطۂ مشرق میں

تشریح دگرگوں ہے اب تیرے پیاموں کی

بگڑے ہوئے تیور ہیں نو عمر سیاست کے

بپھری ہوئی سانسیں ہیں نو مشق نظاموں کی

طبقوں سے نکل کر ہم فرقوں میں نہ بٹ جائیں

بن کر نہ بگڑ جائے تقدیر غلاموں کی

— ساحر لدھیانوی