مکمل شاعری

صدیوں سے انسان یہ سنتا آیا ہے

دکھ کی دھوپ کے آگے سکھ کا سایا ہے

جھوٹ تو قاتل ٹھہرا اس کا کیا رونا

سچ نے بھی انساں کا خوں بہایا ہے

ہم کو ان سستی خوشیوں کا لوبھ نہ دو

ہم نے سوچ سمجھ کر غم اپنایا ہے

اتنے دن احسان کیا دیوانوں پر

جتنے دن لوگوں نے ساتھ نبھایا ہے

پیدائش کے دن سے موت کی زد میں ہیں

اس مقتل میں کون ہمیں لے آیا ہے

اول اول جس دل نے برباد کیا

آخر آخر وہ دل ہی کام آیا ہے

— ساحر لدھیانوی