مکمل شاعری

لو آج ہم نے توڑ دیا رشتۂ امید

لو اب کبھی گلہ نہ کریں گے کسی سے ہم

تنگ آ چکے ہیں کشمکش زندگی سے ہم

ٹھکرا نہ دیں جہاں کو کہیں بے دلی سے ہم

گر زندگی میں مل گئے پھر اتفاق سے

پوچھیں گے اپنا حال تری بے بسی سے ہم

مایوسئ مآل محبت نہ پوچھیے

اپنوں سے پیش آئے ہیں بیگانگی سے ہم

اللہ رے فریب مشیت کہ آج تک

دنیا کے ظلم سہتے رہے خامشی سے ہم

ابھریں گے ایک بار ابھی دل کے ولولے

گو دب گئے ہیں بار غم زندگی سے ہم

— ساحر لدھیانوی