مکمل شاعری

گہن کے روز وہ داغی ہوئی جبیں اس کی

شب شکست وہی جسم بے اماں اس کا

دعا کی راکھ پہ مرمر کا عطرداں اس کا

گزیدگی کے لیے دست مہرباں اس کا

کمند غیر میں سب اسپ و گوسفند اس کے

نشیب خاک میں خفتہ ستارہ داں اس کا

چنی ہوئی ہیں تہہ خشت انگلیاں اس کی

کھلا ہوا ہے پس ریگ بادباں اس کا

تنور یخ میں ٹھٹھرتے ہیں خواب و خوں اس کے

لکھا ہے نام سر لوح رفتگاں اس کا

وہ اک چراغ ہے دیوار خستگی پہ رکا

ہوا ہو تیز تو ہر حال میں زیاں اس کا

اسی سے دھوپ ہے انبار دھند ہے روپوش

گرفت خواب سے برسر ہے کارواں اس کا

— رضی عابدی