مکمل شاعری

کیسا ہنسنا کیسا رونا ایک تماشہ دنیا کا

آرائش کا قمقمہ جیسے جلتے ہیں بجھ جاتے ہیں

دل ہی اپنا بس میں نہیں ہے دل ہی اپنا دشمن ہے

اوروں پر الزام نہیں وہ تو اپنے بن جاتے ہیں

دنیا دھوکا مایا کھوٹی لوگ یہاں سب جھوٹے ہیں

کیسی کیسی باتیں کر کے ہم دل کو بہلاتے ہیں

چاہے بھلے ہوں چاہے برے ہوں ہر صورت تڑپاتے ہیں

مہر و وفا کی بات نہیں ہے دوست بہت یاد آتے ہیں

جیسی ہم پر گزری سب پر ایسی کچھ ہی گزرتی ہے

جھوٹے سچے قصوں سے ہم کون سی بات بناتے ہیں

تیرا نام بھی لب پر لاتے اب اس واسطے ڈرتے ہیں

لوگ بہت ہیں اور لوگوں میں افسانے ہو جاتے ہیں

یوں تو شاید کوئی ملا ہو لیکن بچھڑے کتنے دوست

جس کو کھو دیتے ہیں گویا صرف اسی کو پاتے ہیں

— رضی عابدی