مکمل شاعری

تم اس کو قسمت کی بات جانو اسے مقدر کا کھیل سمجھو

ہدایتیں احمقوں سے لینا یہ آزمائش بہت کڑی ہے

اندھیر نگری کے شاہزادو یہ رات بس ایک دو گھڑی ہے

دلوں کے گھاؤ چمک اٹھے ہیں لہو کی ندی ابل پڑی ہے

ہماری آنکھوں میں آنکھیں ڈالو تو جان لو گے کہ اپنی بازی

زمین کی بیداد سے ٹھنی ہے فلک کی رفتار سے لڑی ہے

شہر شہر جشن کا سماں ہے وہ موت کا رقص ہو رہا ہے

افق پہ ایسے انار چلتے ہیں جیسے برسات کی جھڑی ہے

تمہاری خاطر نہ جانے کب کی ہمیں تو معراج مل چکی ہے

جو ہم اٹھا کر صلیب لائے تھے اب تمہارے لئے گڑی ہے

لہو کو برساتی ہیں جو آنکھیں اب ان سے شعلے نکل رہے ہیں

ہماری دنیا یہ لگ رہا ہے کسی نئے موڑ پر کھڑی ہے

تمہارے قبضہ میں دکھ ہی دکھ ہیں مگر سنو موت کے فرشتو

ہماری جھولی میں زندگی ہے جو سب دکھوں سے بہت بڑی ہے

— رضی عابدی