مکمل شاعری
بات اتنی بھی نہ تھی جی سے گزر جاتے ہم
اک نگاہ غلط انداز سے مر جاتے ہم
دوپہر بھی نہ ڈھلی اور نہ پتھر ہی کٹے
شام ہوتی تو کہیں لوٹ کے گھر جاتے ہم
اب تو یوں لگتا ہے بس غم نے جکڑ رکھا ہے
غم نہ ہوتے تو بھلا کب کے بکھر جاتے ہم
کیسا کیسا نہ زمانے نے تراشا ہم کو
سخت پتھر بھی جو ہوتے تو سنور جاتے ہم
زرد چہرے پہ تھا گزری ہوئی خوشیوں کا غبار
پیار کی بوند بھی پڑتی تو نکھر جاتے ہم
دکھ کے صحراؤں میں چیخوں نے قدم روک لیے
ورنہ آنکھوں کے سمندر میں اتر جاتے ہم
نہ بلاتے ہمیں محفل تو سجائی ہوتی
لوح احساس پہ دکھ بن کے ابھر جاتے ہم
تجھ سے ساون کی گھٹائیں تو نہیں مانگی تھیں
اتنے پیاسے تھے کہ اک بوند سے بھر جاتے ہم
منزل شوق ہی ویران پڑی ہے کب سے
ورنہ اس راہ سے یوں خاک بسر جاتے ہم
— رضی عابدی