مکمل شاعری

جتنے دن کا ساتھ لکھا تھا سات رہے

اب کچھ دن تو آنکھوں میں برسات رہے

اندر کی دیوی نے یہ چمکار کہا

نرم ہے دل تو کاہے لہجہ دھات رہے

تم ویسے کے ویسے ہو تو لا یعنی

مانا قربانی بھی کی عرفات رہے

اب نا شکری کرنا اور معاملہ ہے

حاصل ہم کو عشق رہا ثمرات رہے

ایک بھی دل جو تم تسخیر نہ کر پائے

کیا پایا جو حاصل کائنات رہے

حسرتؔ ان آنکھوں میں چشمے پھوٹ پڑے

جتنا چپ رہ سکتے تھے جذبات رہے

ایک اکیلے شخص کا کام نہیں لگتا

شامل اس کے ساتھ کئی جنات رہے

ہم تھے بے چینی کے حلقے اور سکوت

دن میں تھوڑی چھوٹ ملی تو رات رہے

شاہوں کی شہ خرچی کم نہ ہو پائی

ہم جیسوں کے جیسے تھے حالات رہے

— رشید حسرت