مکمل شاعری

پلکوں کی منڈیروں پہ پرندوں کو اڑاؤ

تسلیم کیا تم مجھے سمجھا تو رہے ہو

بیڑی یہ مرے پاؤں میں پہنا تو رہے ہو

پھر عہد خودی توڑ کے تم جا تو رہے ہو

انسان کبھی رزق سے بھی سیر ہوا ہے

تقدیر میں تھا جتنا لکھا پا تو رہے ہو

اس میں بھی کوئی رمز کوئی فلسفہ ہوگا

حسرتؔ جی ابھی جھوم کے تم گا تو رہے ہو

پچھتاوا نہ ہو کل یہ قدم سوچ کے لینا

جذبات میں الفت کی قسم کھا تو رہے ہو

کل ٹھوکروں میں جگ کی کہیں چھوڑ نہ دینا

اک درد زدہ شخص کو اپنا تو رہے ہو

سمجھایا تھا کل کتنا مگر باز نہ آئے

کیا ہوگا ابھی مانا کہ پچھتا تو رہے ہو

اب ایک نئے طرز رفاقت پہ عمل ہو

تم بیچ میں لوگوں کے بھی تنہا تو رہے ہو

رہنے بھی ابھی دیجیے اشکوں کا تکلف

جب جانتے ہو دل پہ ستم ڈھا تو رہے ہو

— رشید حسرت