مکمل شاعری
اٹھی نگاہ تو اپنے ہی رو بہ رو ہم تھے
زمین آئنہ خانہ تھی چار سو ہم تھے
دنوں کے بعد اچانک تمہارا دھیان آیا
خدا کا شکر کہ اس وقت با وضو ہم تھے
زمیں پہ لڑتے ہوئے آسماں کے نرغے میں
کبھی کبھی کوئی دشمن کبھو کبھو ہم تھے
وہ آئینہ تو نہیں تھا پر آئینے سا تھا
وہ ہم نہیں تھے مگر یار ہو بہ ہو ہم تھے
خیال تھا کہ یہ پتھراؤ روک دیں چل کر
جو ہوش آیا تو دیکھا لہو لہو ہم تھے
ہمارا ذکر بھی اب جرم ہو گیا ہے وہاں
دنوں کی بات ہے محفل کی آبرو ہم تھے
— راحت اندوری