مکمل شاعری
میں نے دنیا سے مجھ سے دنیا نے
سیکڑوں بار بے وفائی کی
ہم نے خود اپنی رہنمائی کی
اور شہرت ہوئی خدائی کی
ٹوٹ کر ہم ملے ہیں پہلی بار
یہ شروعات ہے جدائی کی
کھلے رہتے ہیں سارے دروازے
کوئی صورت نہیں رہائی کی
منزلیں چومتی ہیں میرے قدم
داد دیجے شکستہ پائی کی
سوئے رہتے ہیں اوڑھ کر خود کو
اب ضرورت نہیں رضائی کی
عشق کے کاروبار میں ہم نے
جان دے کر بڑی کمائی کی
زندگی جیسے تیسے کاٹنی ہے
کیا بھلائی کی کیا برائی کی
اب کسی کی زباں نہیں کھلتی
رسم جاری ہے منہ بھرائی کی
— راحت اندوری