مکمل شاعری

چراغوں کا گھرانا چل رہا ہے

ہوا سے دوستانہ چل رہا ہے

مری گم گشتگی پر ہنسنے والو

مرے پیچھے زمانہ چل رہا ہے

ابھی ہم زندگی سے مل نہ پائے

تعارف غائبانہ چل رہا ہے

جوانی کی ہوائیں چل رہی ہیں

بزرگوں کا خزانہ چل رہا ہے

وہی محشر وہی ملنے کا وعدہ

وہی بوڑھا بہانا چل رہا ہے

نئے کردار آتے جا رہے ہیں

مگر ناٹک پرانا چل رہا ہے

زیادہ کیا توقع ہو غزل سے

میاں بس آب و دانہ چل رہا ہے

سمندر سے کسی دن پھر ملیں گے

ابھی پینا پلانا چل رہا ہے

یہاں اک مدرسہ ہوتا تھا پہلے

مگر اب کارخانہ چل رہا ہے

وہی دنیا وہی سانسیں وہی ہم

وہی سب کچھ پرانا چل رہا ہے

— راحت اندوری