مکمل شاعری

جو بیت گئی اس کی خبر ہے کہ نہیں ہے

دیکھو مرے تن پر مرا سر ہے کہ نہیں ہے

یاروں کو بہت پیار ہے زندان وفا سے

لیکن کسی دیوار میں در ہے کہ نہیں ہے

ملتی ہو ضیا جس کو چراغوں کی لوؤں سے

اس شہر میں ایسا کوئی گھر ہے کہ نہیں ہے

اس شہر ندامت سے جو آئے ہیں پلٹ کر

در پیش نیا ان کو سفر ہے کہ نہیں ہے

سورج کی گزر گاہ بنے شاخ نہ جس کی

ایسا کوئی رستے میں شجر ہے کہ نہیں ہے

چہرے پہ سجا لایا ہوں میں دل کی صدائیں

دنیا میں کوئی اہل نظر ہے کہ نہیں ہے

کیوں تیرا گریباں ہے قتیلؔ اب بھی سلامت

کچھ تجھ پہ نئی رت کا اثر ہے کہ نہیں ہے

برسات میں کوئل سی جہاں کوک رہی تھی

آباد وہ خوابوں کا نگر ہے کہ نہیں ہے

ٹوٹی ہوئی مسجد میں کھڑا دیکھ رہا ہوں

محفوظ شوالے کا گجر ہے کہ نہیں ہے

— قتیل شفائی