مکمل شاعری
تیز دھوپ میں آئی ایسی لہر سردی کی
موم کا ہر اک پتلا بچ گیا پگھلنے سے
جو بھی رنگ ہے تیرا بس وہی غنیمت ہے
چہرے کب نکھرتے ہیں منہ پہ خاک ملنے سے
یار کیوں گریزاں ہے سیدھی راہ چلنے سے
منزلیں نہیں ملتیں راستے بدلنے سے
بن گئے ثبوت آخر آپ اپنے جرموں کا
ہاتھ جو معطر تھے پھول کو مسلنے سے
کر سکا ہے گدلا کون روشنی کے چشمے کو
چاند بجھ نہیں جاتا آندھیوں کے چلنے سے
سو کے تو گنوا بیٹھا رتجگوں کی رعنائی
اب قتیلؔ کیا حاصل تیرے ہاتھ ملنے سے
— قتیل شفائی