مکمل شاعری

ہم کو تو انتظار سحر بھی قبول ہے

لیکن شب فراق ترا کیا اصول ہے

باقی ہے پو پھٹے بھی ستاروں کی روشنی

شاید مریض شب کی طبیعت ملول ہے

کانٹا ہے وہ کہ جس نے چمن کو لہو دیا

خون بہار جس نے پیا ہے وہ پھول ہے

جب معتبر نہیں تھا مرا عشق بدگماں

اب حسن خود فروش کا رونا فضول ہے

اے ماہ نیم شب تری رفتار کے نثار

یہ چاندنی نہیں ترے قدموں کی دھول ہے

دیکھا تھا اہل دل نے کوئی سرو نو بہار

دامن الجھ گیا تو پکارے ببول ہے

لٹ کر سمجھ رہے ہیں کہ نادم ہے راہزن

کتنی حسین اہل مروت کی بھول ہے

— قتیل شفائی