مکمل شاعری
ہم اسے یاد بہت آئیں گے
جب اسے بھی کوئی ٹھکرائے گا
تو نہ ہوگی تو پھر اے شام فراق
کون آ کر ہمیں بہلائے گا
مرحلہ رات کا جب آئے گا
جسم سائے کو ترس جائے گا
چل پڑی رسم جو کج فہمی کی
بات کیا پھر کوئی کر پائے گا
اعتبار اس کا ہمیشہ کرنا
وہ تو جھوٹی بھی قسم کھائے گا
سچ سے کترائے اگر لوگ یہاں
لفظ مفہوم سے کترائے گا
کائنات اس کی مری ذات میں ہے
مجھ کو کھو کر وہ کسے پائے گا
نہ رہے جب وہ بھلے دن بھی قتیلؔ
یہ زمانہ بھی گزر جائے گا
— قتیل شفائی