مکمل شاعری

تمام شہر میں کیا ایک بھی نہیں منصور

کہیں گے کیا رسن و دار آؤ سچ بولیں

کھلا ہے جھوٹ کا بازار آؤ سچ بولیں

نہ ہو بلا سے خریدار آؤ سچ بولیں

سنا ہے وقت کا حاکم بڑا ہی منصف ہے

پکار کر سر دربار آؤ سچ بولیں

سکوت چھایا ہے انسانیت کی قدروں پر

یہی ہے موقع اظہار آؤ سچ بولیں

بجا کہ خوئے وفا ایک بھی حسیں میں نہیں

کہاں کے ہم بھی وفادار آؤ سچ بولیں

جو وصف ہم میں نہیں کیوں کریں کسی میں تلاش

اگر ضمیر ہے بیدار آؤ سچ بولیں

ہمیں گواہ بنایا ہے وقت نے اپنا

بنام عظمت کردار آؤ سچ بولیں

چھپائے سے کہیں چھپتے ہیں داغ چہرے کے

نظر ہے آئنہ بردار آؤ سچ بولیں

قتیلؔ جن پہ سدا پتھروں کو پیار آیا

کدھر گئے وہ گنہ گار آؤ سچ بولیں

— قتیل شفائی