مکمل شاعری

وہ دل ہی کیا ترے ملنے کی جو دعا نہ کرے

میں تجھ کو بھول کے زندہ رہوں خدا نہ کرے

رہے گا ساتھ ترا پیار زندگی بن کر

یہ اور بات مری زندگی وفا نہ کرے

بجھا دیا ہے نصیبوں نے میرے پیار کا چاند

کوئی دیا مری پلکوں پہ اب جلا نہ کرے

سنا ہے اس کو محبت دعائیں دیتی ہے

جو دل پہ چوٹ تو کھائے مگر گلہ نہ کرے

یہ ٹھیک ہے نہیں مرتا کوئی جدائی میں

خدا کسی کو کسی سے مگر جدا نہ کرے

اگر وفا پہ بھروسہ رہے نہ دنیا کو

تو کوئی شخص محبت کا حوصلہ نہ کرے

زمانہ دیکھ چکا ہے پرکھ چکا ہے اسے

قتیلؔ جان سے جائے پر التجا نہ کرے

— قتیل شفائی