مکمل شاعری

اب یاد نہیں کہ زندگی میں

میں آخری بار کب ہنسی تھی

ہم کس کی زبان بولتے ہیں

گر ذہن میں بات دوسری تھی

جب کچھ بھی نہ تھا یہاں پہ ماقبل

دنیا کس چیز سے بنی تھی

ہے عکس تو آئنہ کہاں ہے

تمثیل یہ کس جہان کی تھی

مٹھی میں تو رنگ تھے ہزاروں

بس ہاتھ سے ریت بہہ رہی تھی

جب ساز کی لے بدل گئی تھی

وہ رقص کی کون سی گھڑی تھی

تنہا ہے اگر ازل سے انساں

یہ بزم کلام کیوں سجی تھی

کیوں موڑ بدل گئی کہانی

پہلے سے اگر لکھی ہوئی تھی

تھا آگ ہی گر مرا مقدر

کیوں خاک میں پھر شفا رکھی تھی

— پروین شاکر