مکمل شاعری

شب وہی لیکن ستارہ اور ہے

اب سفر کا استعارہ اور ہے

ایک مٹھی ریت میں کیسے رہے

اس سمندر کا کنارہ اور ہے

جنگ کا ہتھیار طے کچھ اور تھا

تیر سینے میں اتارا اور ہے

موج کے مڑنے میں کتنی دیر ہے

ناؤ ڈالی اور دھارا اور ہے

متن میں تو جرم ثابت ہے مگر

حاشیہ سارے کا سارا اور ہے

ساتھ تو میرا زمیں دیتی مگر

آسماں کا ہی اشارہ اور ہے

ہارنے میں اک انا کی بات تھی

جیت جانے میں خسارا اور ہے

دیر سے پلکیں نہیں جھپکیں مری

پیش جاں اب کے نظارہ اور ہے

دھوپ میں دیوار ہی کام آئے گی

تیز بارش کا سہارا اور ہے

حد چراغوں کی یہاں سے ختم ہے

آج سے رستہ ہمارا اور ہے

سکھ کے موسم انگلیوں پر گن لیے

فصل غم کا گوشوارہ اور ہے

اور کچھ پل اس کا رستہ دیکھ لوں

آسماں پر ایک تارہ اور ہے

— پروین شاکر