مکمل شاعری
یادوں کی آباد گلی میں
گھوم رہا ہے تنہا چاند
دن میں وحشت بہل گئی
رات ہوئی اور نکلا چاند
میری کروٹ پر جاگ اٹھے
نیند کا کتنا کچا چاند
پورا دکھ اور آدھا چاند
ہجر کی شب اور ایسا چاند
کس مقتل سے گزرا ہوگا
اتنا سہما سہما چاند
میرے منہ کو کس حیرت سے
دیکھ رہا ہے بھولا چاند
اتنے گھنے بادل کے پیچھے
کتنا تنہا ہوگا چاند
جب پانی میں چہرہ دیکھا
تو نے کس کو سوچا چاند
برگد کی اک شاخ ہٹا کر
جانے کس کو جھانکا چاند
اتنے روشن چہرے پر بھی
سورج کا ہے سایا چاند
بادل کے ریشم جھولے میں
بھور سمے تک سویا چاند
آنسو روکے نور نہائے
دل دریا تن صحرا چاند
رات کے شاید ایک بجے ہیں
سوتا ہوگا میرا چاند
ہاتھ ہلا کر رخصت ہوگا
اس کی صورت ہجر کا چاند
رات کے شانے پر سر رکھے
دیکھ رہا ہے سپنا چاند
صحرا صحرا بھٹک رہا ہے
اپنے عشق میں سچا چاند
سوکھے پتوں کے جھرمٹ پر
شبنم تھی یا ننھا چاند
— پروین شاکر