مکمل شاعری

ہر آواز زمستانی ہے ہر جذبہ زندانی ہے

کوچۂ یار سے دار و رسن تک ایک سی ہی ویرانی ہے

دل کہتا ہے وہ کچھ بھی ہو اس کی یاد جگائے رکھ

عقل یہ کہتی ہے کہ توہم پر جینا نادانی ہے

جتنے آگ کے دریا میں سب پار ہمیں کو کرنا ہیں

دنیا کس کے ساتھ آئی ہے دنیا تو دیوانی ہے

آپ بھی کیسے شہر میں آ کر شاعر کہلائے ہیں علیمؔ

درد جہاں کم یاب بہت ہے نغموں کی ارزانی ہے

تیرے پیار سے پہلے کب تھا دل میں ایسا سوز و گداز

تجھ سے پیار کیا تو ہم نے اپنی قیمت جانی ہے

لمحہ لمحہ خواب دکھائے اور سو سو تعبیر کرے

لذت کم آزار بہت ہے جس کا نام جوانی ہے

کتنے کوہ گراں کاٹے تب صبح طرب کی دید ہوئی

اور یہ صبح طرب بھی یارو کہتے ہیں بیگانی ہے

— عبید اللہ علیم