مکمل شاعری
جہاں بیٹھے صدائے غیب آئی
یہ سایہ بھی اسی دیوار کا ہے
مجسم ہو گئے سب خواب میرے
مجھے میرا خزانہ مل گیا ہے
کوئی رفتار ہوگی روشنی کی
مگر وہ اس سے بھی آگے گیا ہے
حقیقت ایک ہے لذت میں لیکن
حکایت سلسلہ در سلسلہ ہے
وصال یار سے پہلے محبت
خود اپنی ذات کا اک راستا ہے
یوں ہی حیراں نہیں ہیں آنکھ والے
کہیں اک آئنہ رکھا ہوا ہے
سلامت آئنے میں ایک چہرہ
شکستہ ہو تو کتنا دیکھتا ہے
کمال آدمی کی انتہا ہے
وہ آئندہ میں بھی سب سے بڑا ہے
— عبید اللہ علیم