مکمل شاعری

ہم نے کھلنے نہ دیا بے سر و سامانی کو

کہاں لے جائیں مگر شہر کی ویرانی کو

آج بھی اس کو فراز آج بھی عالی ہے وہی

وہی سجدہ جو کرے وقت کی سلطانی کو

کوزۂ حرف میں لایا ہوں تمہاری خاطر

روح پر اترے ہوئے ایک عجب پانی کو

کوئی تقسیم نئی کر کے چلا جاتا ہے

جو بھی آتا ہے مرے گھر کی نگہبانی کو

صرف گفتار سے زخموں کا رفو چاہتے ہیں

یہ سیاست ہے تو پھر کیا کہیں نادانی کو

بے حسی وہ ہے کہ کرتا نہیں انساں محسوس

اپنی ہی روح میں آئی ہوئی طغیانی کو

اب کہاں جاؤں کہ گھر میں بھی ہوں دشمن اپنا

اور باہر مرا دشمن ہے نگہبانی کو

وہ بھی ہر آن نیا میری محبت بھی نئی

جلوۂ حسن کشش ہے مری حیرانی کو

صبح کھلنے کی ہو یا شام بکھر جانے کی

ہم نے خوشبو ہی کیا اپنی پریشانی کو

آج یوسف پہ اگر وقت یہ لائے ہو تو کیا

کل تمہیں تخت بھی دو گے اسی زندانی کو

— عبید اللہ علیم