مکمل شاعری

جو اس نے کیا اسے صلہ دے

مولا مجھے صبر کی جزا دے

یا میرے دیئے کی لو بڑھا دے

یا رات کو صبح سے ملا دے

اک میرا وجود سن رہا ہے

الہام جو رات کی ہوا دے

جس شخص نے عمر ہجر کاٹی

اس شخص کو ایک رات کیا دے

کیا چیز ہے خواہش بدن بھی

ہر بار نیا ہی ذائقہ دے

چھونے میں یہ ڈر کہ مر نہ جاؤں

چھو لوں تو وہ زندگی سوا دے

دکھتا ہے بدن کہ پھر ملے وہ

مل جائے تو روح کو دکھا دے

اترے گا نہ کوئی آسماں سے

اک آس میں دل مگر صدا دے

مجھ سے مرا کوئی ملنے والا

بچھڑا تو نہیں مگر ملا دے

چہرہ مجھے اپنا دیکھنے کو

اب دست ہوس میں آئینہ دے

بچوں کی طرح یہ لفظ میرے

معبود انہیں بولنا سکھا دے

سچ ہوں تو مجھے امر بنا دے

جھوٹا ہوں تو نقش سب مٹا دے

دکھ دہر کے اپنے نام لکھوں

ہر دکھ مجھے ذات کا مزا دے

یہ قوم عجیب ہو گئی ہے

اس قوم کو خوئے انبیا دے

— عبید اللہ علیم