مکمل شاعری
یہ کیسی بچھڑنے کی سزا ہے
آئینے میں چہرہ رکھ گیا ہے
خورشید مثال شخص کل شام
مٹی کے سپرد کر دیا ہے
ویران سرائے کا دیا ہے
جو کون و مکاں میں جل رہا ہے
میں کون سا خواب دیکھتا ہوں
یہ کون سے ملک کی فضا ہے
تم مر گئے حوصلہ تمہارا
زندہ ہوں میں یہ میرا حوصلہ ہے
اندر بھی زمیں کے روشنی ہو
مٹی میں چراغ رکھ دیا ہے
گردش میں ہیں کتنی کائناتیں
بچہ مرا پاؤں چل رہا ہے
رکھا تھا خلا میں پاؤں میں نے
رستے میں ستارہ آ گیا ہے
شاید کہ خدا میں اور مجھ میں
اک جست کا اور فاصلہ ہے
وہ کون سا ہاتھ ہے کہ جس نے
مجھ آگ کو خاک سے لکھا ہے
— عبید اللہ علیم