مکمل شاعری

ہم سفر خوش نہ ہو محبت سے

جانے ہم کس کے ہوں تمنائی

کیسے پاؤ مجھے جو تم دیکھو

سطح ساحل سے میری گہرائی

تم گئے تھے تو ساتھ لے جاتے

اب یہ کس کام کی ہے بینائی

ہم کہ تھے لذت حیات میں گم

جاں سے اک موج تشنگی آئی

کوئی دیوانہ کہتا جاتا تھا

زندگی یہ نہیں مرے بھائی

آؤ تم ہی کرو مسیحائی

اب بہلتی نہیں ہے تنہائی

اول عشق میں خبر بھی نہ تھی

عزتیں بخشتی ہے رسوائی

جن میں ہم کھیل کر جوان ہوئے

وہی گلیاں ہوئیں تماشائی

— عبید اللہ علیم