مکمل شاعری

ہجر کرتے یا کوئی وصل گزارا کرتے

ہم بہرحال بسر خواب تمہارا کرتے

ایک ایسی بھی گھڑی عشق میں آئی تھی کہ ہم

خاک کو ہاتھ لگاتے تو ستارا کرتے

محو آرائش رخ ہے وہ قیامت سر بام

آنکھ اگر آئینہ ہوتی تو نظارا کرتے

اب تو مل جاؤ ہمیں تم کہ تمہاری خاطر

اتنی دور آ گئے دنیا سے کنارا کرتے

ایک چہرے میں تو ممکن نہیں اتنے چہرے

کس سے کرتے جو کوئی عشق دوبارا کرتے

کون رکھتا ہے اندھیرے میں دیا آنکھ میں خواب

تیری جانب ہی ترے لوگ اشارا کرتے

ظرف آئینہ کہاں اور ترا حسن کہاں

ہم ترے چہرے سے آئینہ سنوارا کرتے

جب ہے یہ خانۂ دل آپ کی خلوت کے لیے

پھر کوئی آئے یہاں کیسے گوارا کرتے

— عبید اللہ علیم