مکمل شاعری

ازل سے فطرت آزاد ہی تھی آوارہ

یہ کیوں کہیں کہ ہمیں کوئی رہنما نہ ملا

کنار موج میں مرنا تو ہم کو آتا ہے

نشان ساحل الفت ملا ملا نہ ملا

حیات شوق کی یہ گرمیاں کہاں ہوتیں

خدا کا شکر ہمیں نالۂ رسا نہ ملا

یہ کائنات کسی کا غبار راہ سہی

دلیل راہ جو بنتا وہ نقش پا نہ ملا

ترے کرم سے خدائی میں یوں تو کیا نہ ملا

مگر جو تو نہ ملا زیست کا مزا نہ ملا

یہ دل شہید فریب نگاہ ہو نہ سکا

وہ لاکھ ہم سے بہ انداز محرمانہ ملا

تری تلاش ہی تھی مایۂ بقائے وجود

بلا سے ہم کو سر منزل بقا نہ ملا

— ن م راشد