مکمل شاعری
یہاں اک شہر تھا شہر نگاراں
نہ چھوڑی وقت نے اس کی نشانی
سناتا ہے کوئی بھولی کہانی
مہکتے میٹھے دریاؤں کا پانی
یہاں جنگل تھے آبادی سے پہلے
سنا ہے میں نے لوگوں کی زبانی
میں وہ دل ہوں دبستان الم کا
جسے روئے گی برسوں شادمانی
تحیر نے اسے دیکھا ہے اکثر
خرد کہتی ہے جس کو لا مکانی
خیالوں ہی میں اکثر بیٹھے بیٹھے
بسا لیتا ہوں اک دنیا سہانی
ہجوم نشۂ فکر سخن میں
بدل جاتے ہیں لفظوں کے معانی
پہاڑوں سے چلی پھر کوئی آندھی
اڑے جاتے ہیں اوراق خزانی
بتا اے ظلمت صحرائے امکاں
کہاں ہوگا مرے خوابوں کا ثانی
نئی دنیا کے ہنگاموں میں ناصرؔ
دبی جاتی ہیں آوازیں پرانی
کرن پریاں اترتی ہیں کہاں سے
کہاں جاتے ہیں رستے کہکشانی
اندھیری شام کے پردوں میں چھپ کر
کسے روتی ہے چشموں کی روانی
— ناصر کاظمی