مکمل شاعری
دن کے ہنگاموں کو بیکار نہ جان
شب کے پردوں میں ہے کیا غور سے سن
دل تڑپ اٹھتا ہے کیوں آخر شب
دو گھڑی کان لگا غور سے سن
یاس کی چھاؤں میں سونے والے
جاگ اور شور ذرا غور سے سن
کیوں ٹھہر جاتے ہیں دریا سر شام
روح کے تار ہلا غور سے سن
برگ آوارہ بھی اک مطرب ہے
طائر نغمہ سرا غور سے سن
کبھی فرصت ہو تو اے صبح جمال
شب گزیدوں کی دعا غور سے سن
خامشی حاصل موسیقی ہے
نغمہ ہے نغمہ نما غور سے سن
ساز ہستی کی صدا غور سے سن
کیوں ہے یہ شور بپا غور سے سن
ہے یہی ساعت ایجاب و قبول
صبح کی لو کو ذرا غور سے سن
اسی منزل میں ہیں سب ہجر و وصال
رہرو آبلہ پا غور سے سن
اسی گوشے میں ہیں سب دیر و حرم
دل صنم ہے کہ خدا غور سے سن
موت اور زیست کے اسرار رموز
عامری بزم میں آ غور سے سن
کچھ تو کہتی ہیں چٹک کر کلیاں
کیا سناتی ہے صبا غور سے سن
ہر قدم راہ طلب میں ناصرؔ
جرس دل کی صدا غور سے سن
ہر نفس دام گرفتاری ہے
نو گرفتار بلا غور سے سن
عشق کو حسن سے خالی نہ سمجھ
نالۂ اہل وفا غور سے سن
آئنہ دیکھ کے حیران نہ ہو
نغمۂ آب صفا غور سے سن
دل سے ہر وقت کوئی کہتا ہے
میں نہیں تجھ سے جدا غور سے سن
چڑھتے سورج کی ادا کو پہچان
ڈوبتے دن کی ندا غور سے سن
کعبہ سنسان ہے کیوں اے واعظ
ہاتھ کانوں سے اٹھا غور سے سن
کیا گزرتی ہے کسی کے دل پر
تو بھی اے جان وفا غور سے سن
رنگ منت کش آواز نہیں
کل بھی ہے ایک نوا غور سے سن