مکمل شاعری
او پچھلی رت کے ساتھی
اب کے برس میں تنہا ہوں
اپنی دھن میں رہتا ہوں
میں بھی تیرے جیسا ہوں
میرا دیا جلائے کون
میں ترا خالی کمرہ ہوں
اپنی لہر ہے اپنا روگ
دریا ہوں اور پیاسا ہوں
تیری گلی میں سارا دن
دکھ کے کنکر چنتا ہوں
مجھ سے آنکھ ملائے کون
میں تیرا آئینہ ہوں
تو جیون کی بھری گلی
میں جنگل کا رستہ ہوں
آتی رت مجھے روئے گی
جاتی رت کا جھونکا ہوں
تیرے سوا مجھے پہنے کون
میں ترے تن کا کپڑا ہوں
— ناصر کاظمی