مکمل شاعری

گماں ہے کیا اس صنم کدے پر

خیال مرگ و حیات کیا ہے

یہ آنکھ کیوں ہے یہ ہاتھ کیا ہے

یہ دن ہے کیا چیز رات کیا ہے

فراق خورشید و ماہ کیوں ہے

یہ ان کا اور میرا ساتھ کیا ہے

فغاں ہے کس کے لیے دلوں میں

خروش دریائے ذات کیا ہے

فلک ہے کیوں قید مستقل میں

زمیں پہ حرف نجات کیا ہے

منیرؔ اس شہر غم زدہ پر

ترا یہ سحر نشاط کیا ہے

ہے کون کس کے لیے پریشاں

پتہ تو دے اصل بات کیا ہے

ہے لمس کیوں رائیگاں ہمیشہ

فنا میں خوف ثبات کیا ہے

— منیر نیازی