مکمل شاعری

مہک عجب سی ہو گئی پڑے پڑے صندوق میں

رنگت پھیکی پڑ گئی ریشم کے رومال کی

شہر میں ڈر تھا موت کا چاند کی چوتھی رات کو

اینٹوں کی اس کھوہ میں دہشت تھی بھونچال کی

دیکھ کے مجھ کو غور سے پھر وہ چپ سے ہو گئے

دل میں خلش ہے آج تک اس ان کہے سوال کی

عمر کے ساتھ عجیب سا بن جاتا ہے آدمی

حالت دیکھ کے دکھ ہوا آج اس پری جمال کی

شام جھکی تھی بحر پر پاگل ہو کر رنگ سے

یا تصویر تھی خواب میں میرے کسی خیال کی

آئی ہے اب یاد کیا رات اک بیتے سال کی

یہی ہوا تھی باغ میں یہی صدا گھڑیال کی

— منیر نیازی