مکمل شاعری

سودا تھا بلائے جوش پر رات

بستر پہ بچھائے نیشتر رات

افسانہ سمجھ کے سو گئے وہ

کام آئی فغان بے اثر رات

بگڑے تھے یہاں وہ آن کر رات

بے طور بنی تھی جان پر رات

اندھیر پڑا زمانے میں ہائے

نے دن کو ہے مہر نے قمر رات

آئینے میں ہو نہ موم جادو

سوتے نہیں اب وہ تا سحر رات

اس لیل و نہار غم نے مارا

ہے روز سے سیاہ تر رات

ہم تا سحر آپ میں نہیں تھے

کیا جانے رہے وہ کس کے گھر رات

تارے آنکھیں جھپک رہے تھے

تھا بام پہ کون جلوہ گر رات

اس گھر میں ہے عیش خلد مومنؔ

کیا جانے کہاں ہے دن کدھر رات

یہ بات بڑھی کہ مر گئے ہم

موت آئی تھی قصہ مختصر رات

کیا پوچھو ہو منکر و نکیر آہ

بگڑے جو وہ طعن غیر پر رات

— مومن خاں مومن