مکمل شاعری

کیوں الجھتے ہو جنبش لب سے

خیر ہے میں نے کیا کیا صاحب

کیوں لگے دینے خط آزادی

کچھ گنہ بھی غلام کا صاحب

تم بھی رہنے لگے خفا صاحب

کہیں سایہ مرا پڑا صاحب

ہے یہ بندہ ہی بے وفا صاحب

غیر اور تم بھلے بھلا صاحب

ستم آزار ظلم و جور و جفا

جو کیا سو بھلا کیا صاحب

ہائے ری چھیڑ رات سن سن کے

حال میرا کہا کہ کیا صاحب

کس کو دیتے تھے گالیاں لاکھوں

کس کا شب ذکر خیر تھا صاحب

دم آخر بھی تم نہیں آتے

بندگی اب کہ میں چلا صاحب

کس سے بگڑے تھے کس پہ غصہ تھا

رات تم کس پہ تھے خفا صاحب

نام عشق بتاں نہ لو مومنؔ

کیجئے بس خدا خدا صاحب

— مومن خاں مومن