مکمل شاعری

بوالہوس اور لاف جانبازی

کھیل کیسا سمجھ لیا ہے عشق

آفت جاں ہے کوئی پردہ نشیں

کہ مرے دل میں آ چھپا ہے عشق

قہر ہے موت ہے قضا ہے عشق

سچ تو یوں ہے بری بلا ہے عشق

اثر غم ذرا بتا دینا

وہ بہت پوچھتے ہیں کیا ہے عشق

وصل میں احتمال شادی مرگ

چارہ گر درد بے دوا ہے عشق

ہم کو ترجیح تم پہ ہے یعنی

دل ربا حسن و جاں ربا ہے عشق

کس ملاحت سرشت کو چاہا

تلخ کامی پہ بامزا ہے عشق

سوجھے کیونکر فریب دل داری

دشمن آشنا نما ہے عشق

دیکھیے کس جگہ ڈبو دے گا

میری کشتی کا ناخدا ہے عشق

قیس و فرہاد و وامق و مومنؔ

مر گئے سب ہی کیا وبا ہے عشق

دیکھ حالت مری کہیں کافر

نام دوزخ کا کیوں دھرا ہے عشق

اب تو دل عشق کا مزا چکھا

ہم نہ کہتے تھے کیوں برا ہے عشق

آپ مجھ سے نباہیں گے سچ ہے

باوفا حسن و بے وفا ہے عشق

میں وہ مجنون وحشت آرا ہوں

نام سے میرے بھاگتا ہے عشق

— مومن خاں مومن