مکمل شاعری

آنکھ نہ لگنے سے شب احباب نے

آنکھ کے لگ جانے کا چرچا کیا

ان سے پری وش کو نہ دیکھے کوئی

مجھ کو مری شرم نے رسوا کیا

دیدۂ حیراں نے تماشا کیا

دیر تلک وہ مجھے دیکھا کیا

ضبط فغاں گو کہ اثر تھا کیا

حوصلہ کیا کیا نہ کیا کیا کیا

مر گئے اس کے لب جاں بخش پر

ہم نے علاج آپ ہی اپنا کیا

بجھ گئی اک آہ میں شمع حیات

مجھ کو دم سرد نے ٹھنڈا کیا

جور کا شکوہ نہ کروں ظلم ہے

راز مرا صبر نے افشا کیا

غیر عیادت سے برا مانتے

قتل کیا آن کے اچھا کیا

زندگیٔ ہجر بھی اک موت تھی

مرگ نے کیا کار مسیحا کیا

کچھ بھی بن آتی نہیں کیا کیجیے

اس کے بگڑنے نے کچھ ایسا کیا

پان میں یہ رنگ کہاں آپ نے

آپ مرے خون کا دعویٰ کیا

جائے تھی تیری مرے دل میں سو ہے

غیر سے کیوں شکوۂ بے جا کیا

رحم فلک اور مرے حال پر

تو نے کرم اے ستم آرا کیا

سچ ہی سہی آپ کا پیماں ولے

مرگ نے کب وعدۂ فردا کیا

دشمن مومنؔ ہی رہے بت سدا

مجھ سے مرے نام نے یہ کیا کیا

دعویٔ تکلیف سے جلاد نے

روز جزا قتل پھر اپنا کیا

مرگ نے ہجراں میں چھپایا ہے منہ

لو منہ اسی پردہ نشیں کا کیا

— مومن خاں مومن