مکمل شاعری

موسم زرد میں اک دل کو بچاؤں کیسے

ایسی رت میں تو گھنے پیڑ بھی جھڑ جاتے ہیں

کیوں ترے درد کو دیں تہمت ویرانئ دل

زلزلوں میں تو بھرے شہر اجڑ جاتے ہیں

اب یہ سوچوں تو بھنور ذہن میں پڑ جاتے ہیں

کیسے چہرے ہیں جو ملتے ہی بچھڑ جاتے ہیں

شدت غم میں بھی زندہ ہوں تو حیرت کیسی

کچھ دیئے تند ہواؤں سے بھی لڑ جاتے ہیں

وہ بھی کیا لوگ ہیں محسنؔ جو وفا کی خاطر

خود تراشیدہ اصولوں پہ بھی اڑ جاتے ہیں

شغل ارباب ہنر پوچھتے کیا ہو کہ یہ لوگ

پتھروں میں بھی کبھی آئنے جڑ جاتی ہیں

اب کوئی کیا مرے قدموں کے نشاں ڈھونڈے گا

تیز آندھی میں تو خیمہ بھی اکھڑ جاتے ہیں

سوچ کا آئنہ دھندلا ہو تو پھر وقت کے ساتھ

چاند چہروں کے خد و خال بگڑ جاتے ہیں

— محسن نقوی