مکمل شاعری
تو مست شب اندھیری اور اغیار ساتھ ہے
جو دل میں آوے کہہ یہ گنہ گار ساتھ ہے
جو گل ہے یاں سو اس گل رخسار ساتھ ہے
کیا گل ہے وہ کہ جس کے یہ گل زار ساتھ ہے
کرتے تو ہو مرے مرض دل کا تم علاج
یارو جو دل یہی ہے تو آزار ساتھ ہے
سوداؔ کے ہاتھ کیوں کے لگے وہ متاع حسن
لے نکلیں جس کو گھر سے تو بازار ساتھ ہے
پیغام اس نگہ کا کہ جس میں ہے بوئے مہر
کیا جانے کس کے آخری دیدار ساتھ ہے
خاموش عندلیب چمن تجھ سے کیا ہے بحث
اپنا سخن تو مرغ گرفتار ساتھ ہے
عقدہ نہ یہ کھلا کہ مرے دل سا پہلوان
تجھ زلف کے بندھا ہوا اک تار ساتھ ہے
— محمد رفیع سودا