مکمل شاعری

ایک ہم سے تجھے نہیں اخلاص

گھر بہ گھر تجھ کو ہر کہیں اخلاص

رو سیاہی سوا نہیں حاصل

نام سے مت کر اے نگیں اخلاص

دیکھ تجھ زلف و رو کی الفت کو

کرتے ہیں آج کفر و دیں اخلاص

گر تمنا گہر کی ہے تو کر

چشم میری سے آستیں اخلاص

آدم اس دام میں پھنسا سوداؔ

رکھے دانے سے خوشہ چیں اخلاص

مثل نقش قدم یہ رکھتی ہے

تیرے در سے مری جبیں اخلاص

زور ہی ہم سے تیں رکھا پیارے

واہ وا رحمت آفریں اخلاص

— محمد رفیع سودا