مکمل شاعری

اپنے کا ہے گناہ بیگانے نے کیا کیا

اس دل کو کیا کہوں کہ دوانے نے کیا کیا

یاں تک ستانا مج کو کہ رو رو کہے تو ہائے

یارو نہ تم سنا کہ فلانے نے کیا کیا

آنکھوں کی رہبری نے کہوں کیا کہ دل کے ساتھ

کوچے کی اس کے راہ بتانے نے کیا کیا

ٹک در تک اپنے آ مرے ناصح کا حال دیکھ

میں تو دوانا تھا پہ سیانے نے کیا کیا

کہتا تھا میں گلے کا ترے ہو پڑوں گا ہار

دیکھا نہ گل کو سر پہ چڑھانے نے کیا کیا

چاہوں میں کس طرح یہ زمانے کی دوستی

اوروں سے دوست ہو کے زمانے نے کیا کیا

سوداؔ ہے بے طرح کا نشہ جام عشق میں

دیکھا کہ اس کو منہ کے لگانے نے کیا کیا

کام آئی کوہ کن کی مشقت نہ عشق میں

پتھر سے جوئے شیر کے لانے نے کیا کیا

پردہ تو راز عشق سے اے یار اٹھ چکا

بے سود ہم سے منہ کے چھپانے نے کیا کیا

— محمد رفیع سودا