مکمل شاعری

کیوں کر نہ بکوں میں ہاتھ اس کے

یوسف کی طرح میں خواب دیکھا

کچھ میں ہی نہیں ہوں، ایک عالم

اس کے لیے یاں خراب دیکھا

بے جرم و گناہ قتل عاشق

مذہب میں ترے صواب دیکھا

دل تو نے عبث لکھا تھا نامہ

جو ان نے دیا جواب دیکھا

چہرے پہ نہ یہ نقاب دیکھا

پردے میں تھا آفتاب دیکھا

کچھ ہووے تو ہو عدم میں راحت

ہستی میں تو ہم عذاب دیکھا

جس چشم نے مجھ طرف نظر کی

اس چشم کو میں پر آب دیکھا

حیران وہ تیرے عشق میں ہے

یاں ہم نے جو شیخ و شاب دیکھا

بھولا ہے وہ دل سے لطف اس کا

سوداؔ نے یہ جب عتاب دیکھا

— محمد رفیع سودا