مکمل شاعری

رخصت ہے باغباں کہ تنک دیکھ لیں چمن

جاتے ہیں واں جہاں سے پھر آیا نہ جائے گا

دل مت ٹپک نظر سے کہ پایا نہ جائے گا

جوں اشک پھر زمیں سے اٹھایا نہ جائے گا

پہنچیں گے اس چمن میں نہ ہم داد کو کبھو

جوں گل یہ چاک جیب سلایا نہ جائے گا

آنے سے فوج خط کے نہ ہو دل کو مخلصی

بندھوا ہے زلف کا یہ چھٹایا نہ جائے گا

تیغ جفائے یار سے دل سر نہ پھیریو

پھر منہ وفا کو ہم سے دکھایا نہ جائے گا

عمامے کو اتار کے پڑھیو نماز شیخ

سجدے سے ورنہ سر کو اٹھایا نہ جائے گا

آوے گا وہ چمن میں نہ اے ابر جب تلک

پانی گلوں کے منہ میں چوایا نہ جائے گا

زاہد گلے سے مستوں کے باز آنے کا نہیں

تا مے کدے میں لا کے چھکایا نہ جائے گا

ظالم نہ میں کہا تھا کہ اس خوں سے درگزر

سوداؔ کا قتل ہے یہ چھپایا نہ جائے گا

دامان و داغ تیغ کو دھویا تو کیا ہوا

عالم کے دل سے داغ دھلایا نہ جائے گا

— محمد رفیع سودا