مکمل شاعری

ہر سنگ میں شرار ہے تیرے ظہور کا

موسیٰ نہیں کہ سیر کروں کوہ طور کا

پڑھیے درود حسن صبیح و ملیح پر

جلوہ ہر ایک پر ہے محمد کے نور کا

بیکس کوئی مرے تو جلے اس پہ دل مرا

گویا ہے یہ چراغ غریباں کی گور کا

توڑوں یہ آئنہ کہ ہم آغوش عکس ہے

ہووے نہ مج کو پاس جو تیرے حضور کا

ساقی سے کہہ کہ ہے شب مہتاب جلوہ گر

دے بسمہ پوش ہو کے تو ساغر بلور کا

سوداؔ کبھی نہ مانیو واعظ کی گفتگو

آوازۂ دہل ہے خوش آیند دور کا

ہم تو قفس میں آن کے خاموش ہو رہے

اے ہم صفیر فائدہ ناحق کے شور کا

— محمد رفیع سودا